▪الاسم: أحمد مهدي محمد
▪تاريخ الميلاد: 15/8
▪البرج: الأسد
▪النشاة: ليبيا طرابلس
▪الترتيب في العيلة: وسط
▪الدراسة أو التخصص: إعلام ، قسم الإذاعه والتلفزيون
▪مجالات العمل: يعني عملت في مجال الإعلام في التقديم التلفزيوني والإذاعه، كنت فتره في قناة النيل الازرق واستفدت منها جدا في المجال الصحفي كانت لي تجربة في صحيفة الصيحة استفدت منها جدا واتعرفت فيها علي كثير من الزملاء وأصبح منهم جزء من الأصدقاء المقربين ولازال الواحد بيتعلم ، عملت كمنسق إعلام وعلاقات عامة بمركز بيت المعرفه للتدريب والاستشارات ، مؤخرا بديت أنتج برامج تلفزيونيه كعمل خاص وأسسنا أنا وصيقي يزيد شركة سياحة واسميناها تانوت امني بتعمل علي التعريف بالسياحة السودانية واقامة رحل لسودانين وأجانب والموضوع في السياحه يطوول…
▪تجربة عملية أضافت ليك كتير: امكن ثلاث تجارب اولها انو كان عندي شغل مختلف تماما عن دراستي وكان عبارة عن مشغل او مصنع صغير بتاع حلويات وكان كويس جدا لظروف وقفت الشغل ، بس برجع ليهو تاني وبطريقه مختلفه عموما اتعلمت منو حاجات كتييره ما بقدر كنت اتعلما من اي مكان
الحاجة التانية ، أنا اشتغلت ايام الجامعه في سوق امدرمان فسوق امدرمان دا مدرسة قائمة بي ذاتة اتعلمت منو دروس وعلمني معني كيف تقدر تعتمد علي نفسك وتكون علاقات ناجحه، والحمدلله مبسوط بتجربة سوق امدرمان جدا
التجربة الثالثة ، عملت دورة “ToT” واخذت العشرات من دورات التمنية البشرية وامكن افادتني شديد علي يد مدربين مشهود ليهم بالخبره علي مستوي الوطن العربي وانا إمكن اتحظيت اني ادربت علي ايدهم
الكلام هنا كتيييييير شديد هههه
▪الحياة علمتك شنو؟: علمتي انو مافي شي بدووم وانو الانسان اتوقع اي حاجه وأي شي، علمتي انو أي حاجه عشان تصل ليها لازم تعمل بالأسباب، ونعقلها ونتوكل والباقي علي ربنا
وفي جملة انا بحبها جدا..بتقول
(علي كف القدر نمشي ولا ندري بالمكتوب)
▪الهوايات: كرة القدم والرياضة بصورة عامة، الاطلاع، بدندن احيانا ، بحب قراءة وتجويد القرآن الكريم وكنت في الثانوي فزت بجائزة افضل مقرئ في المدارس الثانوية في محلية امدرمان
▪الطموح: بطمح انو اكون عندي رسالة اقدما في الحياة بصورة عامة واني ما اعيش واموت من غير ما اكون قدمت شي لي ولي شعبي بصورة عامة
▪مهمتك في مجلة السودان: انا صراحه مهتم بالمجال الاجتماعي والسياحي وحابي اشتغل علي الحتة دي من حوارات مع رموز مجتمع شخصيات عامة فنانين ممثلين، ظرفاء، شخصيات قدمت للبلد حابي من خلال المجله نعكسها للعالم الخارجي واعتقد السودان مليان بالشخصيات الممكن تقدم للمجله جدا، ودي حاجة بتعمل جذب للمتابعين
▪بداية حبكم للمجال الهسي حتمسكوه في المجلة: من ما كلمتني فدوي كفكره واني حاسيها حاجه حتخدم البلد ، صراحة في الاول اتخوفت بس تاني جبيتا