عادات وتقاليد سودانية …فطور العريس
عاده سودانيه اصيله.. يقدمه اهل العروس لاهل العريس في يوم حنة العريس او يوم الكرامه كما يطلق عليه بعض الناس بالسودان.. يقومون فيه بتحضير اصناف كثيره ومتنوعه من الطعام مما لذ وطاب من اكلات سودانيه تقليديه وفطاير وحلويات ومشروبات تقليديه. بكميات كثيره تكفي المدعوون من معازيم اهل العريس.. يرسل معه بعض الهدايا لوالدة العريس من عطور سودانيه وثياب لها ولاخوات العريس.. وملابس للعريس خاصه بليلة الجرتق…
تاخذ الفطور مجموعه من كبار السيدات في اسرة العروس ويقدمونه لاهل العريس.. وتصاحب سيرة فطور العريس الاغاني والاهازيج والزغاريد السودانيه المخصصه لذلك وبالتالي يستقبلونهم اهل العروس بالمثل ويقدمون الهدايا للنساء اللاتي احضرن الفطور… وتبدأ الافراح وتستمر.. الي ليلة الزفاف والجرتق.
عادة سودانية جميلة نختلف او نتفق عليها
بس تظل تحمل في طياتها الحب والود والاحترام, ولكنها الآن باتت مكلفه وقاصمه للظهر ومعضلة في طريق الشباب للزوج تثقل كاهلهم نتمني أن تضع وزرها ، فاشكال الحب والود تختلف ممكن التعبير عنها بابسط الاشياء تقوية أواصر القربي والنسب ألا يعتبر التصاهر اكبر دليل محبه … دعوة لتجاوز غلاء المهور …….. أميرة الشباب يا السمحة أنا جايك عريس
بي كتب الكتاب يا الملكة مهرك ما رخيص
عارفك جميله وزايده في البنوت حلا
والمال عليك يا غالية أبداً ما غِلا
لكن ظروفنا القاسية كيف بنبدلا
فاضل وحاتك بس نفوسنا مدللا
من قلبي دايرك ليّ شريكه وأم عيال
لكنو قربك ليّ بعيد صعب المنال
يعجبني فيك لو قلتي أنا ما دايره مال
وأصلو العرس بالفاتحة يا ناس ما حلال
بت المدن يا الواعية يا الدارسة الكتاب
غلا المهور حاربيهو ما تخليلو باب
إتمنى خت الحنة وأعرض في السحاب
وأرقّص بنات حلتنا دايرات الشباب
عايش وحيد بلدي فيها الحور بنات
عاشق جمال بنوتنا سمحات الصفات
قولوا خير باركوا العرس يا الأمهات
على الشباب خايف يفوت فيهو الفوات ..
Copyright secured by Digiprove © 2020 Ashraf Eltom
