يازول خبارك ماشي وين وأيام بعادنا أبت تمر
خليتني أتمطق رجاك واصلو الفراق جد طعمو مر
حافظاها خطواتي الأرضبدل التراب بوطأ في جمر
وأنا وإنت والهم زي بعض إلا الفرق حبة صبر
والموت هو بس بفرق كتير شان البموت بمشي القبر
وأنا أنا موتي في ريدك حياة وكل موتة هي بداية عمر
شنو المنع الكلام جواك خلاك تجابد في السكات
حاوشتا ريدنا الكان زمان قفلتو من كل الجهات
يازول معجن بالجفاء ماليني بفرقه وشتات
يوماتي هجرك لي بزيد حابس جواي الامنيات
وأنا ما بناضم بالخداع بتهجا’ ليل الامسيات
الليلة حيل اشواقنا حي لكن وجودك فيني مات
وصاح ردتك بدون أسأل ولا فكرتا يوم أنساك
وكنت بخاف تفوت ترحل أفتش ليك وما ألقاك
وأكون محتاره في بعادك ويضيع عمري اللقيتو معاك
يا الضحكتك وجعه وعذاب مالقيت معاك غير الألم
أنا كنت بهواك بصدق جوه الوريد بتجري دم
وبغني ليك أجمل قصيد وبعزف على وترك نغم
ولو مره زار قلبك وجع بملاني خوف وبزيدني هم
وأنا عمري ما اهتميت لحب كرامتي بس عندي الأهم
ما بوعدك أديك معاي فرصة رجوع
بس بنصحك لمن تريد أوعاك يوم
تهمل هواك تمشي وتغيب عز الطلوع
ما الحب بدايتو حنان وشوق
لكن نهايتو أسى ودموع
ناندي بت هندسه
