تعال

تعال أتونسك جواك

أضم إيد اشتياقي عليك..

ونتماسك نساسق في دريبات العشم بينا يصب غيم الحنان الفيك..
ونتسابق يكون الميس حدود نبضك..

تجي الأول ويكون أحلي الهدايا مجيك..

تعال نسرح مع النسمات نخش كل بيت نزيدو براح..
تعال نفرح مع الأطفال نفتش لي شليلنا الراح..
تعال نصبح
إجابه صحيحه في زمنا غباهو الصاح..
تعال نكدح
مع كل زول بقوم من الصباح يمرق..
يجيب اللقمه هم وعرق وينوم رغم التعب مرتاح..

تعال أنا داسه ليك العيد وتكبيرو الصباحية…
براءة طفلة لابسة جديد ابوها أداها عيدية..
تفارق بيت وتدخل بيت
فرح والله منسية..
وتعال انا داسه ليك الريد وشمعات الوداد حية..
تعال ابنيلي جواك بيت
وطن من الفرح عمران..
وطن يقراهو طفلي نشيد
يرددوا سورة في القرآن..
وطن حق كل زول فينا…
وطن لي كل زول فينا..
بدون قبلية..
لا عصبية لا ألوان…
وطن في حضنو مابتجوع
وجارك بالشبع عيان..
وطن ما تموت عصافيرو
وخيرو بتختفوا الغربان..
وطن انسان..
وطن بيقدر الإنسان..
واظنو ندايا ليك وصل..
واظنك مابتدور عنوان
لاني قريبه بسكن فيك
وفي كل زول ملامحو بتشبه السودان..

هيام الاس