أمي

بي ست الحبايب دايرة أجمل نظمي..
ست ريدى وهناي المالكة روحى ودمى..
يا حروفي العزاز عارفاك جد بتهمي..
كيف ياحروفى توفيهو النضم فوق أمي..

من دون الخلوق أمي العطوفة وحانية…
أمي عشانا في كل الظروف متفانية…
أمي الجنة لينا دوام قطوفك دانية….
أمي الما بتغيب عن بالي حت لو ثانيه..

أمي بترحم المسكين وتكرم ضيفا..
أمي العارفة واجبا ما بتدور تعريفا
أمي المااشتكت منهما يطول صيفا
وأمي بالحروف غالبني جد توصيفا

أمي الحافظة بين الناس تملى مقاما..
أمي الفي المكارم باقية واضحة علامة
أمي صغيرة جنبك مهما اطول في القامة
أمي نبينا قال الجنة تحت اقداما

ماها الفى المجالس قهقهت مسرورة..
ماها الفى الفريق حامت يمين مستورة
إن كان الأمر عندي ولدي الصورة
تبقى الأصل هي ويبقى الجميع الصورة

ملكة وبت ملوك ما فيها شك أو ريبه..
أمي الحافظة لي دينا وكريمة واديبه..
في سمح الخصال الأولي جد ترتيبا..
أمي بالهزار تب مابتجيب العيبة..

ياربى الكريم أن أمي تستر حالا…
واشف وعافى يامولاي وزيل أوبالا..
أديها المحبة وديما ريح بالا..
بلغا مقصدا وحقق جميع آمالا…

ياربى الكريم أنا أمي تصلح شانا…
من واسع عطاك ياغالي زيد ميزانا…
في الدنيا العبوس زيل دمعتا وأحزانا….
وفى يوم الحساب في الجنة تلقى مكانا…

 

هيام الاسد